曼谷

(唉, 又唔知按錯咩制, 打0左成篇野冇晒, 又要打過. , 相片番到香港先補上)
近排泰國話有咩恐怖襲擊警告, 但成個星期0係曼谷又唔多覺有咩特別, 最多都係入MRT站要搜袋.
曼谷, 近一年來, 原來已經來過2次, 仲有2次0係機場轉機. 今次係第三次到曼谷. 但原來對上兩次真係未試過有時間可以自己行下. 所以對曼谷冇咩認識, 咁今次工作比較輕鬆, 5, 6點做完野都唔知去邊好.
之前又冇咩留意有咩好行, 見都近黃昏, 就打算去河邊影下日落. 坐MRT去到最尾一個站, 次後再打的去河邊.
打的由MRT到河邊途中, 會經過China Town, 發覺d鋪頭好早關門. d金鋪係將d金鏈一抽一抽掛住來賣. 回程時, 順做0係China Town試下佢地d魚翅湯. 其實對魚翅都冇咩特別偏好, 不過好似又平又正, 咁咪去試下law. 去0左南星(原來香港有分店), 六十蚊港紙已經有一個小煲魚翅湯, d湯係幾濃, 都幾多料.
番到酒店, 當然要試下Thai Massage. 第一次試Thai Massage, 感覺成個過程比人又拉又屈, 做完成個人既柔軟度都好似高0左, d手手腳腳仲好似長0左.
泰國都幾多外貌似中國食物既野, 始終好多泰國人佢地對上2, 3代都係中國人. 不過有d "中國食物" 真係得個樣. 見佢地d月餅好似做得幾靚仔, 就買0左來做早餐, 點知一入口, 入面唔係蓮容, 完全唔同味, 仲好似有d榴槤味, 如果唔係未過期, 我一定以為個月餅變壞0左.
講開食野, 泰國係幾平既, 0係酒店附近間叫 Black Canyon Cafe叫0左一個炒河, 一個冬蔭, 一碟雞翼, 一個黑豆西米糖水, 加杯鮮果汁  都係港紙五六十蚊.  呢幾日見到d野食咁平, 真係食食食食....得個食字. 各位如果想增磅長肉, 去泰國都係唔錯.
不過, 我估我就唔會點肥到啦, 因為我真係咁耐都未習慣東南亞d水土, 呢幾日日日都痾兩次, 對我來講反而係最佳既天然洗腸tim.
呢幾日做完野, 順便行埋附近既IT Mall, 同一個幾大既商場, 叫 Esplanade. 個 IT Mall, 查實即係一個大dd既電腦商場. 同香港以前一樣, 一定有好多賣番梘software, dvd既鋪頭.
行左一陣個商場, 咁0岩見到有得做 300 (本來都打算番香港睇), 咁就即刻買9點半. 一開始個售票員話收 500泰銖 , 我話有冇咁貴 (成舊幾水港紙), 佢話比你坐VIP座, 一般票價係 140泰銖. 吓, 唔通講英文就當我係水魚 . 我當然冇咁富貴坐VIP座啦.
okay, 比錢前問清楚唔係泰語配音, 點知睇時都係有d騎呢野, 做咩攪到好似細個入d戲院睇3級片咁架, 打格仔既.  真係打0左個突, 笑0左出來.  另一樣, 攪野既係一開始播晒廣告時, 突然逢一聲, 來個全體起立. 真係又唔知點反應, 唯有人企自己又企, 之後又播0左段泰文, 一d泰王既片段, 一d神神佛佛既, 都唔知佢地做咩 .
最後要講下泰國人.
我覺得佢包容性係幾好,  你睇街上既的士既顏色, 真係咩顏色都有, 連幾惡頂既粉紅色的士都有 (我諗起邦邦夫婦架 "粉紅戰車" ), 你就知佢地幾包容啦. haha. 就算泰國既華人最多都係叫自己做Thai-Chinese, 都係認自己係泰國人先, 冇咩話分咩種族.
至於泰國人做野, 唔係講起都唔知, 原來大部份泰國人係八點上班, 而且好多都做到好夜先放工. 所以唔可以話佢地懶. 不過以效率, 同質量來講, 始終都仲係差d, 唔係我都唔會有咁多時候可以0係曼谷四周行.
泰國人對泰王真係好尊敬, 我估通街泰王d相可能仲多過文革時既老毛. 仲人, 每個星期一, 成街人都係著黃衫. 而且我估每個人最少都有2, 3件印有皇室嘜頭既黃色T-Shirt.
[打住咁多先, 遲下諗到d咩再加上去]
臨上機又update下先. 泰國人既食量係好細, 我都唔算食得多野架啦, 不過同檯食飯, 佢地問點解香港人食咁多野.  有d嚇親佢地.
泰文就好得意, 下下講野都好陰聲細氣咁, 真係好多泰仔講泰文比香港女仔講廣東話 "溫柔" 好多.
另外, 各位0係泰國機場要小心啦. 上次轉機同今次番香港我都遇到以下既情況.  個情形係有1至2個華人用國語問你係咪中國人, 話自己係中國北京定上海人, 話d錢0岩0岩唔夠買機票 (個藉口係可能跌0左銀包, 或其他...), 問你借錢買機票, 第日點樣點樣比番你, 或匯比你... 我第一次遇到, 都懷疑會唔會係真, 冇野由d呃人手段咁兒戲. 但今次番香港又比我遇到... (可能我個樣真係似水魚)