香港保衛戰紀念virtual run

 全世界無得去旅行, 要呼吸新鮮空氣, 自然往香港既方便, 又易行既郊野出發. 

見到有一個紀念保衛香港而捐驅士兵既活動, 香港保衛戰紀念virtual run, 廿公里到, 就算跑唔到, 當行下山, 懷緬下二次大戰既戰時遺跡, 亦係一個唔錯既活動. 

起步點真係好方便, 0係太古, 我坐巴士由東九龍一過海就到. 

路線一開始, 係沿鰂魚涌樹木研習徑而行.

行0左無幾耐, 就會見到二次大戰時, 當時為備戰而起既大型戶外爐灶. 

大會好有心思, 0係呢度為大家準備0左一個遊戲: 就係0係其中一個爐灶, 放0左比大家既紀念品, Poppy. 

離開鰂魚涌樹木研習徑, 沿柏架山道, 再轉上金督馳馬徑. 不知不覺, 已上到半山了.

沿途好多小心豬豬既告示. 

果然總有一隻在你左近. 😆😆😆

一路行, 向今日行程最高點, 小馬山進發. 

過0左小馬山, 一路落山, 接入黃泥涌樹木研習徑.

沿途有不少抗戰遺址, 包括機槍堡. 

彈藥庫, 等等. 唔趕時間的話, 值得花時間參觀. 憑弔.

行程去到一半, 終於到可作小休息既陽明山莊.

小休過後, 沿堤壩轉入紫羅蘭山徑. 

今次大會既路線都幾多樣化, 包括行引水道. 

見到 FREE HK 引水道. 

又可以行一條欣賞南區既風景小徑. 

之前真係未試過0係呢個角度欣賞南區風景. 

終於, 到達今日行程既終點, 赤柱. 

大會建議參加者, 可以買d花去獻比為香港捐驅既英勇戰士. 

試想當年佢地離鄉別井, 軍力強弱懸殊既情況下, 奮力保護香港, 力戰到最後客死異鄉, 絕對值得每個香港人向佢地致敬.