香港-廣州-深圳-廣州-深圳-香港

7月9日 - 7月13日, 少有地要上廣州做野. 其實今次工作時間比較長, 無時間周圍去. 比較值得記錄既係無準備之下乘坐深廣鐵路既 "和諧號".

7月9日, Short notice下, 幾個小時後已經身在廣州啦. 如果時間夾好, 0係紅磡坐火車應該係最快.

住既酒店, 令我諗起雲南, 名字讀上口都有d想起上年身在雲南既時光. 不過, 除0左酒店名, 每日所送有Lost Horizon的節錄書籤之外, 其實完全同心中的日月拉唔上任何關係.

見個blog title, 點解無啦啦有深圳出現呢?

 因為星期四朝早, 老細話要我去深圳見一見個partner. 佢一定以為廣州同深圳好近.

 okay, 去時諗住坐大巴, 點知因為塞車, 足足用0左3粒鐘先由廣州去到深圳.

同個partner開0左40 min會 (無錯, 真係好貴既40 min, 因為足足用0左 5, 6個鐘0係traveling), 因為好怕又要坐3粒鐘巴士, 所以就決定坐地鐵再轉火車.

去到火車站, 先醒起深廣鐵路已經換上 "提速" 既 "和諧號". 個樣係咪都好似幾Hi-tech.

 不過, 同大陸好多設施一樣, 係咪見到幾多污積係車身上.

車上有簡介介紹列車.

d坐位都okay.

雖然係一粒鐘車程, 但係中間係有個餐卡. 叫0左碟牛河, 個服務員叮0左一次係凍, 叫佢再叮多一次, 又係凍. 都係算把啦.

車內有速度同溫度顯示. 最高車速可以去到 200km/hr. 都幾快下.

佢地做咩? 原來d車票係要回收再用. 咁好似我呢d實報實銷既打工仔, 咪要走埋去print番張receipt.

就係咁, 為0左一個40分鐘既meeting, 用0左半日來回廣深兩地.

倫敦轉機

本來0係倫敦轉機都無咩好寫架啦. 不過, 今次仲係第一次因為航班延誤而miss 0左班connecting flight. 本身得果個半鐘轉機, 0係Lisbon時d, ground staff已經話去倫敦班機delay起碼一粒鐘, 一定要同我轉定另一班由倫敦番香港既飛機. 咁又要遲多半日先番到香港.

本來諗住倫敦係BA既地頭, 安排一定唔會有咩問題. 但係結果我對BA既處理過程真係好失望.
本來諗住佢地神早知道班機delay, 到我落機時一定有人舉住我個名, 之後會安排好一齊. 點知原來係無. 唔緊要, 咪自己去搵人. 去到Connecting flight Information counter, 點知無人收0左檔.
問其他人話要過0左immigration先可以搵到BA d人. okay, 行多幾步去搵都唔係問題. 印象中97後香港人過英國海關試過有d阻滯. 不過, 咁多年同過咁多唔同海關既經驗話我知, 呢d情況, 答佢地問題時扮下可憐, 扮下無奈, 一般關員都會有d同情心, 順利放你過去既, 最忌係答佢地時聲大而唔耐煩, 見過d關員可以好有耐心同你慢慢玩.
關員: stay幾耐?
radhk: one night
關員: one night…?
radhk: (加d無奈既語氣, 一五一十解釋一次)
關員: 咁係定0左今晚住邊未?
radhk: (無奈狀) 未呀, 要等航空公司安排
關員: 咁係要搵到BA d人先可以入境
radhk: 我試過搵, 不過入面一個BA既人都無 (呢次真係無奈架)
關員:  (本能地咁將我本passport揭來揭去, 睇下我去過邊, 有咩visa…佢對個Pakistan visa幾有興趣架) 你有幾多錢0係身?
radhk: (我身上得一舊水美金, 好驚佢又以錢少諸多為難, 我無直接話我有幾多錢, 又無奈地拎出銀包0係佢面前約略一數) not much but enough
關員: (又再揭我本passport) okay, good luck…
順利入境, 諗住一去到BA既ticket counter就一天光晒. 點知又係無人, 太夜收0左檔. 行晒所有check-in counter, 一個 BA既人都無. 好彩最後都搵到個機場既地勤, 話可以搵到BA既人幫手.
同病相憐, 其他轉唔到機既人.

等下等下過0左大半個鐘, 終於有BA既人同所有各種原因轉唔到機既人登記. 重新定航班, 登記名安排酒店. 如是者又搞0左成個鐘, 終於派酒店voucher, 吓, 點解咁黑仔會無我份既.
我再問BA d人, 佢地話佢地係跟據佢地既record幫有需要既人訂酒店, 之前登記0左名, 唔係一定有酒店. (吓… 我又真係聽唔明佢地既解釋), 不過佢都話即刻同我做番, 咁又要另外等多大半個鐘.
就係因為遲0左比voucher比我, 搞到去到酒店check-in都要等好耐.

最後, 到真係到機場酒店已經係1點半鐘. 由10:30 pm 落機, 左等右等, 搞0左成3粒鐘先上到房休息.
間Park Inn都okay. 不過唔記得d鬼佬酒店係無牙刷 (自己d個人用品仲0係機場件行李到), 搞到要去買牙刷都成四, 五十蛟港紙.

最安慰係個早餐係唔錯.

或者有熟航空公司運作既朋友可以話我知BA咁既處理過程係咁正常. 不過, 我自己覺得真係好難接受.
實在太少時間0係倫敦, 除0左d野好貴, 機場好多人, 同埋見到架的士. 對倫敦真係無咩印象.

很多個第一次

今朝終於番香港, 今次出差, 真係有好多個第一次.
第一次踏足歐洲,
第一次住歐陸式的酒店,
第一次0係倫敦轉機,
第一次趕唔切轉機, 要搞到要滯留倫敦,
第一次人到0左香港, 依家件行理仲0係十萬八千里某處, 仲未確定幾時可以攞.  因為部notebook個adapter放0左0係件行理, 搞到依家開唔到部notebook, 因為影0左既相, 機上打0左既blog仲0係部notebook入面, 所以都係post唔到住.
一次非常滿足既出差經驗, 但對於British Airways一連串的安排都非常失望.

趕. 趕. 趕... 慢. 慢. 慢...

呢次出trip都估計唔多順利, 趕. 趕. 趕. 搞到今日6點幾都做唔晒. 唔理lu, 交帶幾句走人即刻打的去火車站, 遇上廣州成日見到既塞車.  極速由廣州趕番香港, 番到屋企都成9:30pm.
咩都未執, 聽日9點早機, 想剪個skin head先出發都無時間.  看看寄來的機票好彩沒出錯; 好彩家中有少量美金; 好彩上廣州前做定visa; 好彩天氣熱執幾年短衫短褲就okay; 0岩0岩上網買埋旅行保險. 好似基本野都搞掂晒.  其實, 好似酒店, 點由金邊去邏粒都未知, 隨緣啦, 路在口邊, 一定去到既.
不過, 通常咁短時間執野一定執漏野, 希望唔好漏0左d重要野啦. 由呢一刻開始, 一定要改改心情, 由趕. 趕. 趕... 既心情變成慢. 慢. 慢既心情, 咁先似放假.
各位, 連埋個sales meeting, 要兩個星期後先見lu.
P.S. 我部notebook大部份時間都係長著, 依家熄機, 都比佢休息番一個星期.

不能停下來的7月

仲以為可以輕鬆o係香港準備下去旅行tim.
點知今朝收到指示, 今日要即刻動身上廣州一個星期, 廣州返來之後就出發去一個星期旅行 (死啦, 我去旅行一d野都未預備好), 柬埔寨返來之後呢, 就要去公司既sales meeting, 又係一個星期.
搞到去旅行好似係一個其中一個business trip咁.

十年 (二)

不要做垃圾
最近電視各台不是什麼慶祝, 便是什麼回顧. 其實自己對於那些慶祝一向是比較冷感, 所以看到那些舉世歡騰的場面, 真的沒有太大的感覺, 反而那些回顧及訪問倒是值得一看.
有天一開電視, 正在播影的是一個訪問我們風之后珊珊的片段, 一句香港運動員不是垃圾差不多成了她的名言.
她續說, 能力條件差的人不是垃圾, 反而有能力, 有機會的人不去好好利用, 那些人才是垃圾. 那句說話好像正正是對剛巧開著電視的我說

, 有點當頭棒喝.

所以還是把這句說話記下來, 希望可以時時警惕自己, 不要做樂不思蜀的劉禪.

P.S. 最近屋企附近開了間三聯, 看到香港終於有得賣

最危險的廁所與最美的星空

不過價錢是HK$100, 差不多是我在台北買的一倍價錢.

http://hk.myblog.yahoo.com/ck_lee_hk/article?mid=1237&fid=15

十年 (一)

有線依家重播緊十年前同一個時間既片段, 看看十年前的香港人, 好像比現在覺得更自豪.
當時香港的國際地位, 都是靠每個香港人打拼回來. 每個香港人都以住在東方之珠而感到自豪. 相反, 現在的香港人, 當遇到困境時好像只懂得向別人求援, 個體不願工作反而向政府申請綜援 (我記得小時候, 如果申請綜, 算是不太光采的事); 政府不去搞好經濟, 只望大陸向香港施預恩惠.
東方之珠好似越來越暗淡, 就是東方之珠這四個字也越來越少人提了. 昨天, 同事問起一個外國人都好經常問的問題, 到底香港人喜不喜歡回歸大陸?
在我來說真的可以說是既 "歡喜" , 但 "不喜歡". 歡喜的是因為大家始終是中華民族, 在民族立場始終是一件令人開心的事. 不喜歡的是香港人好像失去了昔日的光彩, 當知道原來向上面問下就有著數, 比上面餵得多而好像自己失去搵食的動力.  慢慢地香港由一個國際都市變成了大陸其中的一個城市.
大陸若果真的想香港好, 真的不要再向香港派錢了. 香港的股市炒得不夠熾熱嗎? 香港的股民還是太少嗎? 炒股還不夠瘋狂嗎? 為何還要把大量資金倒進香港股市? 真的想把香港弄成一個只有金融行業的社會嗎?

少有既Guest

今個星期居然罕有地有個外國同事路經香港, 雖然之前都未見過, 只係email上有幾次來往, 佢第一次來香港, 都要搵佢出去食下飯. 佢今次帶佢老婆一齊出trip, 咁當然一齊去食飯啦.
一開始問佢地想食咩, 佢地話唔係western style都okay, 問佢地之前幾日食d咩, 佢地話pizza, america food... 咁佢地住Excelsior, 最方便都係帶佢地去Time Square慢慢揀. 上到去, 見到聘珍樓唔駛等位就問佢地Chinese Food好唔好. 佢地都話都想試下.
跟據以前同舊公司d美國人食飯既經驗, 問清楚有冇對seafood allergic, 叫d美個人食開Chinese Food既大路野, 北京填鴨, 咕嚕肉... 到上菜, 同佢地要0左set刀叉 (我一路以為好多美國人都識用筷子, 可能以前都係對開西岸既美國人啦), 諗住應該無死啦.
同事出慣差, 當然食咩都無咩問題, 但係佢老婆就慘啦, 原來佢對shellfish都幾抗拒, d菜有dd shellfish成碟菜都唔食, 個湯飲0左幾啖就唔飲 (下次呢樣都真係要問清楚), 可能真係口味唔慣, 連佢自己叫既雜菜炒牛肉都唔係好食. 個填鴨都只係食0左一件 (雖然我都覺得佢地整得麻麻) . 成餐飯同事個老婆都無咩落肚, 我估佢番到酒店一定要叫room service.
飯後當散步同佢地行下商場, 同事老婆連搭架有玻璃既升降機都大為緊張 , 行番酒店既路上, 人比去時更加多, 佢老婆不斷咁話好似NYC. 同事掛住同另一個朋友邊行邊吹水, 好快就0係前面人堆中消失, 咁我就同佢老婆一齊行. 好明顯佢唔多習慣係人堆中穿插, 最後仲要 "橋" 住佢隻手帶佢一齊行. 咁純樸既美國人我都係第一次遇到. 

P.S. 今朝check下7月中有冇機位去柬埔寨, 個姐姐仔話我好彩啦, 仲有最後一個, 如果我下2個星期d野搞掂晒, 咁7月中就可以放假啦.

差不多到尾聲了

整個project既testing為期6個星期, 我為0左呢次testing, 計埋呢次就去0左台灣5次, 食CX既飛機包都食到厭 (CX飛台北係serve包, 唔係serve餐), 好彩有同事同我頂0左一個星期  , 唔係真係飛足6次.
今次經驗都幾特別, 做以前既公司都未試過4個投標既vendors有3個都用我公司既產品, 即係要同一時間support3個partners.
開頭以為應該就咁將所有野copy 3份咁簡單, 做落原來3個partner都有d自己既要求3個partners, 即係由preparation, integration, testing, rehearsal到真正0係客面前demo要go through 3次.
其實為0左對3個partners公平及資料保密, 理論上公司要搵3個Engineers去分別support3個partners, 不過公司細就無法啦, 得我一個頂硬上. 原則上, 我地係每個partners allocate 一個星期時間support比佢地準備demo比個客睇, 唔會有resource conflict, 不過, 3個partners既工作室都係0係埋同一層樓, 有時有咩問題, 又好難唔過去睇睇.
不過, 都有個好處既, 就係3個partners都可以熟晒, 將來有咩其他project合作上都方便d.  
其實, 係咪真係好辛苦, 咁又唔係, 雖然工作時間每日係8:30 am - 10:00 pm, 但同過台灣人合作既朋友都知道佢地既效率比香港仲差d, 所以比起去同日本人, 韓國人合作, 都可以算係輕鬆.
今個星期應該係最後一個星期啦 , 希望順順利利過埋佢. 唔駛再去台灣, 可以去下其他地方support, 其實我自己比較鍾意support東南亞既國家多d, 可以去多d唔同既國家, 出差既心情都會靚d.
有時真係覺得人搵工, 工亦搵人, 老實講如果唔係鍾意周圍走, 呢份工都幾難做得長. 另外, 呢份工亦要求幾獨立及幾強既適應能力, 好似, 今次我住桃園, 我d台灣partners都話我點可以住桃園d咁差既小酒店, 我心諗我自己去旅行幾蚊既床位都無問題, 間酒店乾淨, 有得上網, 我就一定無問題.  另外, 出差係好易食肥人架, 好彩我都算唔易食肥既人.
0黎緊2個星期就搞番香港個case, 希望快快手手搞埋佢, o係公司sales meeting前, 抽到一個星期放假實踐我去柬埔寨既旅行大計啦, 咁就perfect.